yahan ke log hain bas apne hi KHayal mein gum

yahāñ ke log haiñ bas apne hī ḳhayāl meñ gum

koī uruuj meñ gum hai koī zavāl meñ gum

nisāb-e-ishq meñ hijr-o-visāl ek se haiñ

hai mere hijr kā rishta tire visāl meñ gum

ye ik nazāra alag hai sabhī nazāroñ se

mirī nazar kā tasalsul tire jamāl meñ gum

ye nāzukī mire sheroñ kī be-sabab to nahīñ

ki merī fikr-e-suḳhan hai isī ġhazāl meñ gum

tumheñ ho kaise ḳhabar ḳhud mujhe nahīñ mālūm

maiñ kis javāb meñ gum huuñ maiñ kis savāl meñ gum

bachā hai kaun yahāñ vaqt ke thapeḌoñ se

hai merī umr-e-gurezāñ bhī māh-o-sāl meñ gum

ye shahr-e-ḳhud-nigarāñ hai nikal chalo 'tāriq'

har ek shaḳhs hai apne hī ḳhadd-o-ḳhāl meñ gum

yahan ke log hain bas apne hi KHayal mein gum

koi uruj mein gum hai koi zawal mein gum

nisab-e-ishq mein hijr-o-visal ek se hain

hai mere hijr ka rishta tere visal mein gum

ye ek nazara alag hai sabhi nazaron se

meri nazar ka tasalsul tere jamal mein gum

ye nazuki mere sheron ki be-sabab to nahin

ki meri fikr-e-suKHan hai isi ghazal mein gum

tumhein ho kaise KHabar KHud mujhe nahin malum

main kis jawab mein gum hun main kis sawal mein gum

bacha hai kaun yahan waqt ke thapeDon se

hai meri umr-e-gurezan bhi mah-o-sal mein gum

ye shahr-e-KHud-nigaran hai nikal chalo 'tariq'

har ek shaKHs hai apne hi KHadd-o-KHal mein gum