yahi bas ek dua mangna nahin aata

yahī bas ek duā māñgnā nahīñ aatā

vafā ke badle vafā māñgnā nahīñ aatā

hamārā kaam mohabbat se pesh aanā hai

kisī kā naam patā māñgnā nahīñ aatā

darīcha khol diyā hai ghuTan se bachne ko

magar zabāñ se havā māñgnā nahīñ aatā

kahīñ mile to ye kahnā mire masīhā se

marīz-e-ġham ko davā māñgnā nahīñ aatā

ye ḳhāmushī koī tūfāñ zarūr lā.egī

ġharīb chup haiñ to kyā māñgnā nahīñ aatā

zarūratoñ ke sivā bhī zarūr miltā magar

zarūratoñ se sivā māñgnā nahīñ aatā

hazār baar kahā dil se maañg le kuchh to

yahī javāb milā māñgnā nahīñ aatā

hamesha ḳhair ke tālib haiñ ham hameñ 'ālam'

tilism-e-hosh-rubā māñgnā nahīñ aatā

yahi bas ek dua mangna nahin aata

wafa ke badle wafa mangna nahin aata

hamara kaam mohabbat se pesh aana hai

kisi ka nam pata mangna nahin aata

daricha khol diya hai ghuTan se bachne ko

magar zaban se hawa mangna nahin aata

kahin mile to ye kahna mere masiha se

mariz-e-gham ko dawa mangna nahin aata

ye KHamushi koi tufan zarur laegi

gharib chup hain to kya mangna nahin aata

zaruraton ke siwa bhi zarur milta magar

zaruraton se siwa mangna nahin aata

hazar bar kaha dil se mang le kuchh to

yahi jawab mila mangna nahin aata

hamesha KHair ke talib hain hum hamein 'alam'

tilism-e-hosh-ruba mangna nahin aata