yahi dua hai yahi hai salam ishq ba-KHair

yahī duā hai yahī hai salām ishq ba-ḳhair

mire sabhī rufqā-e-kirām ishq ba-ḳhair

dayār-e-hijr kī suunī udaas galiyoñ meñ

pukārtā hai koī sub.h-o-shām ishq ba-ḳhair

maiñ kar rahā thā duā kī guzārisheñ us se

so kah ga.ī hai udāsī kī shaam ishq ba-ḳhair

baḌe ajiib haiñ shahr-e-junūñ ke bāshinde

hamesha kahte haiñ ba.ad-az-salām ishq ba-ḳhair

ye rah zarūr tumhāre hī ghar ko jaatī hai

likhā huā hai yahāñ gaam gaam ishq ba-ḳhair

bayān kī hai ġhazal-vār dāstān-e-ishq

so is kitāb kā rakkhā hai naam ishq ba-ḳhair

ufuq ke paar mujhe yaad kar rahā hai koī

abhī milā hai udhar se payām-e-ishq ba-ḳhair

yahi dua hai yahi hai salam ishq ba-KHair

mere sabhi rufqa-e-kiram ishq ba-KHair

dayar-e-hijr ki suni udas galiyon mein

pukarta hai koi subh-o-sham ishq ba-KHair

main kar raha tha dua ki guzarishen us se

so kah gai hai udasi ki sham ishq ba-KHair

baDe ajib hain shahr-e-junun ke bashinde

hamesha kahte hain baad-az-salam ishq ba-KHair

ye rah zarur tumhaare hi ghar ko jati hai

likha hua hai yahan gam gam ishq ba-KHair

bayan ki hai ghazal-war dastan-e-ishq

so is kitab ka rakkha hai nam ishq ba-KHair

ufuq ke par mujhe yaad kar raha hai koi

abhi mila hai udhar se payam-e-ishq ba-KHair