yahi masala hai jo zahido to mujhe kuchh isMein kalam hai

yahī mas.ala hai jo zāhido to mujhe kuchh is meñ kalām hai

vahī shai halāl hai ḳhuld meñ vahī mai-kade meñ harām hai

mirī aañkh meñ jo samā gayā mire dil meñ jis kā maqām hai

abhī mujh se hai vo alag-thalag na payām hai na salām hai

yahī kahnā us se payāmbar ki bas āḳhirī ye payām hai

jo zarā bhī jaane meñ der kī to kisī kā kaam tamām hai

kabhī qat' kī mirī guftugū kabhī kah diyā mujhe kyā hai tū

ye batā tū o but-e-jañg-jū koī ye bhī tarz-e-kalām hai

koī zikr ġhair kā ye na thā jise aap sun ke hue ḳhafā

mujhe apne baḳht se hai gila mujhe apne dil se kalām hai

jo chalā to bazm-e-surūr meñ jo rahā to ālam-e-nūr meñ

mire dil meñ kaif-e-mudām hai mire sar meñ gardish-e-jām hai

vahī shikva tujh ko raqīb kā vahī ronā apne nasīb kā

ye batā tū o dil-e-mubtalā tujhe aur bhī koī kaam hai

mirā naam le ke na kosiye ye kahā to hañs ke vo bol uThe

mujhe kyā ḳhabar thī zamāne meñ faqat aap hī kā ye naam hai

mujhe kufr o diiñ se ġharaz nahīñ ki maiñ ek banda-e-ishq huuñ

koī shaiḳh ho ki ho barhaman mirā duur hī se salām hai

vahī āsmān hai vahī zamīñ magar aañkh us kī jo phir ga.ī

na vo din hai ab na vo raat hai na vo sub.h hai na vo shaam hai

bahut aur māhir-e-fan haiñ yuuñ bahut aur ahl-e-suḳhan haiñ yuuñ

magar aa gayā jo pasand unheñ vo 'hafīz' hī kā kalām hai

yahi masala hai jo zahido to mujhe kuchh is mein kalam hai

wahi shai halal hai KHuld mein wahi mai-kade mein haram hai

meri aankh mein jo sama gaya mere dil mein jis ka maqam hai

abhi mujh se hai wo alag-thalag na payam hai na salam hai

yahi kahna us se payambar ki bas aaKHiri ye payam hai

jo zara bhi jaane mein der ki to kisi ka kaam tamam hai

kabhi qat' ki meri guftugu kabhi kah diya mujhe kya hai tu

ye bata tu o but-e-jang-ju koi ye bhi tarz-e-kalam hai

koi zikr ghair ka ye na tha jise aap sun ke hue KHafa

mujhe apne baKHt se hai gila mujhe apne dil se kalam hai

jo chala to bazm-e-surur mein jo raha to aalam-e-nur mein

mere dil mein kaif-e-mudam hai mere sar mein gardish-e-jam hai

wahi shikwa tujh ko raqib ka wahi rona apne nasib ka

ye bata tu o dil-e-mubtala tujhe aur bhi koi kaam hai

mera nam le ke na kosiye ye kaha to hans ke wo bol uThe

mujhe kya KHabar thi zamane mein faqat aap hi ka ye nam hai

mujhe kufr o din se gharaz nahin ki main ek banda-e-ishq hun

koi shaiKH ho ki ho barhaman mera dur hi se salam hai

wahi aasman hai wahi zamin magar aankh us ki jo phir gai

na wo din hai ab na wo raat hai na wo subh hai na wo sham hai

bahut aur mahir-e-fan hain yun bahut aur ahl-e-suKHan hain yun

magar aa gaya jo pasand unhen wo 'hafiz' hi ka kalam hai