yahi mear ab duniya mein subh-o-sham Thahra hai

yahī me.aar ab duniyā meñ sub.h-o-shām Thahrā hai

havā ke saath chalnā zindagī kā kaam Thahrā hai

kahāñ tak saath degā haq-parastī kā koī āḳhir

sadāqat par hamesha jhuuT kā ilzām Thahrā hai

batā.egā vahī lazzat surūr-o-tishna-kāmī kī

lab-e-dariyā pahuñch kar jo bhī tishna-kām Thahrā hai

sitāre jhāñkne lagte haiñ palkoñ ke darīche se

yahī har muntahā-e-ranj kā anjām Thahrā hai

ga.e vo din ki qātil qābil-e-tāzīr hotā thā

hamāre ahd meñ ab qatl par in.aam Thahrā hai

havāoñ ne bujhāne kī to koshish kī bahut lekin

fasīl-e-shahr par raushan charāġh-e-shām Thahrā hai

vazāhat chāhiye kuchh aur ā.īn-e-siyāsat meñ

abhī ai mohtasib insāf maiñ ib.hām Thahrā hai

maiñ apnī be-gunāhī to abhī sābit na kar paayā

sitam is par tumhārā jurm mere naam Thahrā hai

anā ke zo.am se jab bhī nikal kar baat kī ham ne

hamārā mudda.ā 'siddīq' phir ilhām Thahrā hai

yahi mear ab duniya mein subh-o-sham Thahra hai

hawa ke sath chalna zindagi ka kaam Thahra hai

kahan tak sath dega haq-parasti ka koi aaKHir

sadaqat par hamesha jhuT ka ilzam Thahra hai

bataega wahi lazzat surur-o-tishna-kaami ki

lab-e-dariya pahunch kar jo bhi tishna-kaam Thahra hai

sitare jhankne lagte hain palkon ke dariche se

yahi har muntaha-e-ranj ka anjam Thahra hai

gae wo din ki qatil qabil-e-tazir hota tha

hamare ahd mein ab qatl par inam Thahra hai

hawaon ne bujhane ki to koshish ki bahut lekin

fasil-e-shahr par raushan charagh-e-sham Thahra hai

wazahat chahiye kuchh aur aain-e-siyasat mein

abhi ai mohtasib insaf main ibham Thahra hai

main apni be-gunahi to abhi sabit na kar paya

sitam is par tumhaara jurm mere nam Thahra hai

ana ke zoam se jab bhi nikal kar baat ki hum ne

hamara muddaa 'siddiq' phir ilham Thahra hai