yahi saza hai charaghon se aashnai ki

yahī sazā hai charāġhoñ se āshnā.ī kī

mire ḳhilāf havāoñ ne kārvā.ī kī

nahīñ khule haiñ ka.ī din se bāñdh āñkhoñ ke

badan pe ek parat jam ga.ī hai kaa.ī kī

darīche khol diye raat phir se maazī ke

tamām samt udāsī se raushnā.ī kī

shab-e-visāl khañgālā varaq varaq us kā

badan-kitāb kī tafsīl se paḌhā.ī kī

asīr-e-ishq banā hī liyā mujhe us ne

qubūl ho hī ga.iiñ arziyāñ rihā.ī kī

kahāñ talāsh rahā hai judā.ī ke ma.anī

mujhe nihār maiñ tafsīr huuñ judā.ī kī

yahi saza hai charaghon se aashnai ki

mere KHilaf hawaon ne karwai ki

nahin khule hain kai din se bandh aankhon ke

badan pe ek parat jam gai hai kai ki

dariche khol diye raat phir se mazi ke

tamam samt udasi se raushnai ki

shab-e-visal khangala waraq waraq us ka

badan-kitab ki tafsil se paDhai ki

asir-e-ishq bana hi liya mujhe us ne

qubul ho hi gain arziyan rihai ki

kahan talash raha hai judai ke mani

mujhe nihaar main tafsir hun judai ki