yahi sochte hain aksar kahan aa gae KHushi mein

yahī sochte haiñ aksar kahāñ aa ga.e ḳhushī meñ

ki ye din guzar rahe haiñ jo hisār-e-be-ḳhudī meñ

ye safar hai aarzū kā yahāñ dhūp-chhāñv bhī hai

kabhī dil meñ raushnī hai kabhī dil hai raushnī meñ

vahī deñge ab ujālā tire qalb be-ḳhabar ko

jo charāġh jal uThe haiñ mirī shām-e-zindagī meñ

mujhe e'tibār-e-ulfat tumheñ hai yaqīn merā

koī mil sakā na tum sā mujhe saarī zindagī meñ

tire saath hai kuchh aisā mirī jur.atoñ kā aalam

koī Dar hai zindagī meñ na hai ḳhauf koī jī meñ

tirā naam paḌh rahī huuñ tirā naam likh rahī huuñ

maiñ tujhe samo rahī huuñ mire zauq-e-shā.irī meñ

mirī zaat ko sajāne koī aa.ina na denā

mirā husn jalva-gar hai abhī 'tāj' sādgī meñ

yahi sochte hain aksar kahan aa gae KHushi mein

ki ye din guzar rahe hain jo hisar-e-be-KHudi mein

ye safar hai aarzu ka yahan dhup-chhanw bhi hai

kabhi dil mein raushni hai kabhi dil hai raushni mein

wahi denge ab ujala tere qalb be-KHabar ko

jo charagh jal uThe hain meri sham-e-zindagi mein

mujhe e'tibar-e-ulfat tumhein hai yaqin mera

koi mil saka na tum sa mujhe sari zindagi mein

tere sath hai kuchh aisa meri juraton ka aalam

koi Dar hai zindagi mein na hai KHauf koi ji mein

tera nam paDh rahi hun tera nam likh rahi hun

main tujhe samo rahi hun mere zauq-e-shairi mein

meri zat ko sajaane koi aaina na dena

mera husn jalwa-gar hai abhi 'taj' sadgi mein