yahi sunte aae hain ham-nashin kabhi ahd-e-shuq-e-kamal mein

yahī sunte aa.e haiñ ham-nashīñ kabhī ahd-e-shuq-e-kamāl meñ

koī shahr shahr-e-vafā bhī thā usī sar-zamīn-e-ḳhayāl meñ

mire dil ke ḳhuun kī misl thā tujhe yaad hai mire dilrubā

koī rañg rañg-e-hinā bhī thā tire naqsh-hā-e-jamāl meñ

na vo jhāñknā hai galī galī na vo tāknā hai kalī kalī

na kasak hai hijr ke dard meñ na damak hai shauq-e-visāl meñ

koī ik chamak mire dil ko de ki safar hudūd-e-zamāñ kā hai

koī ek sā.at-e-raushnī mirī gardish-e-mah-o-sāl meñ

mujhe sharq-o-ġharb se kaam kyā ki maqām-e-shauq guzar gayā

ye khilā.e dil ke haiñ dā.ere ye safar hai ab mirā haal meñ

vo jo rāh-e-zulm pe āñdhiyoñ meñ charāġh le ke nikal paḌe

vo zavāl-e-asr ke sar-buland kahāñ haiñ asr-e-zavāl meñ

ye jo tīrgī kā tilism hai yahī raushnī kā bhī ism hai

huā 'bāqar' aap ke qaul kā bhī shumār qaul-e-muhāl hai

yahi sunte aae hain ham-nashin kabhi ahd-e-shuq-e-kamal mein

koi shahr shahr-e-wafa bhi tha usi sar-zamin-e-KHayal mein

mere dil ke KHun ki misl tha tujhe yaad hai mere dilruba

koi rang rang-e-hina bhi tha tere naqsh-ha-e-jamal mein

na wo jhankna hai gali gali na wo takna hai kali kali

na kasak hai hijr ke dard mein na damak hai shauq-e-visal mein

koi ek chamak mere dil ko de ki safar hudud-e-zaman ka hai

koi ek saat-e-raushni meri gardish-e-mah-o-sal mein

mujhe sharq-o-gharb se kaam kya ki maqam-e-shauq guzar gaya

ye khilae dil ke hain daere ye safar hai ab mera haal mein

wo jo rah-e-zulm pe aandhiyon mein charagh le ke nikal paDe

wo zawal-e-asr ke sar-buland kahan hain asr-e-zawal mein

ye jo tirgi ka tilism hai yahi raushni ka bhi ism hai

hua 'baqar' aap ke qaul ka bhi shumar qaul-e-muhaal hai