yahi tazad to hairan karne wala hai

yahī tazād to hairān karne vaalā hai

kahāñ charāġh rakhā hai kahāñ ujālā hai

maiñ zaḳhm zaḳhm huuñ is vāste nashe meñ huuñ

mujhe batāo haram hai ki ye shivāla hai

ra.īs-e-shahr kā ye ālī-shān bañgla bhī

kisī ġharīb se chhīnā huā nivāla hai

amiir logoñ se mahfūz rakh mire mālik

phir ik ġharīb kī beTī ne ḳhud nikālā hai

unhīñ ke sar pe na gir jā.ūñ āsmāñ ban kar

sitamgaroñ ne mirā naam to uchhālā hai

haiñ intizār meñ taare bhī chāñd bhī vo bhī

sunā hai raat meñ sūraj nikālne vaalā hai

havā kī raah meñ jaltā charāġh hai 'rāhī'

vo kyā bujhegā jise raushnī ne paalā hai

yahi tazad to hairan karne wala hai

kahan charagh rakha hai kahan ujala hai

main zaKHm zaKHm hun is waste nashe mein hun

mujhe batao haram hai ki ye shiwala hai

rais-e-shahr ka ye aali-shan bangla bhi

kisi gharib se chhina hua niwala hai

amir logon se mahfuz rakh mere malik

phir ek gharib ki beTi ne KHud nikala hai

unhin ke sar pe na gir jaun aasman ban kar

sitamgaron ne mera nam to uchhaala hai

hain intizar mein tare bhi chand bhi wo bhi

suna hai raat mein suraj nikalne wala hai

hawa ki rah mein jalta charagh hai 'rahi'

wo kya bujhega jise raushni ne pala hai