yahi to gham hai wo shair na wo siyana tha

yahī to ġham hai vo shā.ir na vo siyānā thā

jahāñ pe uñgliyāñ kaTtī thiiñ sar kaTānā thā

mujhe bhī abr kisī koh par gañvā detā

maiñ bach gayā ki samundar kā maiñ ḳhazāna thā

tamām log jo vahshī bane the aaqil the

vo ek shaḳhs jo ḳhāmosh thā divāna thā

patā chalā ye havāoñ ko sar paTakne par

maiñ reg-e-dasht na thā sañg-e-sad-zamāna thā

tamām sabza-o-gul the mulāzim-e-mausam

kalī kā farz hī gulshan meñ muskurānā thā

mire liye na ye mastī na āgahī hai harām

mujhī ko bazm se uThnā thā sar uThānā thā

vo mere haal se mujh ko parakh rahe the 'hasan'

mirī nigāh meñ guzrā huā zamāna thā

yahi to gham hai wo shair na wo siyana tha

jahan pe ungliyan kaTti thin sar kaTana tha

mujhe bhi abr kisi koh par ganwa deta

main bach gaya ki samundar ka main KHazana tha

tamam log jo wahshi bane the aaqil the

wo ek shaKHs jo KHamosh tha diwana tha

pata chala ye hawaon ko sar paTakne par

main reg-e-dasht na tha sang-e-sad-zamana tha

tamam sabza-o-gul the mulazim-e-mausam

kali ka farz hi gulshan mein muskurana tha

mere liye na ye masti na aagahi hai haram

mujhi ko bazm se uThna tha sar uThana tha

wo mere haal se mujh ko parakh rahe the 'hasan'

meri nigah mein guzra hua zamana tha