yahi to waqt hai dil lene ka lagane ka

yahī to vaqt hai dil lene kā lagāne kā

shabāb phir nahīñ ai dost jā ke aane kā

na aa.e is pe sitam dekhiye bahāne kā

ye abr-o-bād bahāna huā na aane kā

latīf-o-narm-o-subuk huuñ nasīm kī mānind

burā na maane koī mere aane jaane kā

mire shabāb ko yā-rab fasāna honā thā

kahāñ vo husn ki unvāñ ho is fasāne kā

maze se shaiḳh jī angūr khaa.e jaate haiñ

hisāb hogā kisī roz daane daane kā

khaḌe haiñ der se masjid ke sāmne 'mohsin'

zarūr bhūle haiñ rasta sharāb-ḳhāne kā

yahi to waqt hai dil lene ka lagane ka

shabab phir nahin ai dost ja ke aane ka

na aae is pe sitam dekhiye bahane ka

ye abr-o-baad bahana hua na aane ka

latif-o-narm-o-subuk hun nasim ki manind

bura na mane koi mere aane jaane ka

mere shabab ko ya-rab fasana hona tha

kahan wo husn ki unwan ho is fasane ka

maze se shaiKH ji angur khae jate hain

hisab hoga kisi roz dane dane ka

khaDe hain der se masjid ke samne 'mohsin'

zarur bhule hain rasta sharab-KHane ka