yaqin had se baDha tha guman se pahle

yaqīn had se baḌhā thā gumān se pahle

jabīñ pe zaḳhm sajā thā nishān se pahle

use bhulāne ke raste meñ kitnī yādeñ thiiñ

shadīd dhuup milī sā.ebān se pahle

phir us ke ba.ad havāoñ se jang kartā rahā

diyā jalā thā baḌī ān-bān se pahle

mire ḳhilāf muqābil na thā munāfiq thā

javāb DhūñDh rahā thā bayān se pahle

natīja us ke hī haq meñ hai ab mohabbat kā

jo saath chhoḌ gayā imtihān se pahle

charāġh-e-shām kī sūrat meñ us kī yaad aa.ī

añdhere phailte jaate the shaan se pahle

tamām shahr ne izzat usī se hāsil kī

jo rasm aa.ī hamāre makān se pahle

dayār-e-jāñ pe bhī kuchh bārish-e-karam ho jaa.e

basāo dil bhī kisī kā makān se pahle

shikasta dil ke liye the jo aasrā 'ādil'

vo taare TuuT ga.e āsmān se pahle

yaqin had se baDha tha guman se pahle

jabin pe zaKHm saja tha nishan se pahle

use bhulane ke raste mein kitni yaaden thin

shadid dhup mili saeban se pahle

phir us ke baad hawaon se jang karta raha

diya jala tha baDi aan-ban se pahle

mere KHilaf muqabil na tha munafiq tha

jawab DhunDh raha tha bayan se pahle

natija us ke hi haq mein hai ab mohabbat ka

jo sath chhoD gaya imtihan se pahle

charagh-e-sham ki surat mein us ki yaad aai

andhere phailte jate the shan se pahle

tamam shahr ne izzat usi se hasil ki

jo rasm aai hamare makan se pahle

dayar-e-jaan pe bhi kuchh barish-e-karam ho jae

basao dil bhi kisi ka makan se pahle

shikasta dil ke liye the jo aasra 'adil'

wo tare TuT gae aasman se pahle