yaqin kar le sar-e-sham koi chaara nahin

yaqīn kar le sar-e-shām koī chāra nahīñ

binā diye ke añdhere tirā guzārā nahīñ

hamīñ haiñ markazī kirdār pūchh lo us se

abhī tak us ne kahānī meñ ham ko maarā nahīñ

badal to dī hai har ik chiiz us ne kamre kī

magar hameñ abhī dīvār se utārā nahīñ

hameñ ḳhabar hai ki manzil to ek hai lekin

jidhar zamāna hai vo rāsta hamārā nahīñ

judā hue haiñ to ham ek ho bhī sakte haiñ

ḳhalā hai darmiyāñ dariyāoñ kā kinārā nahīñ

ye raaz khol diyā kab kā dasht-o-sahrā ne

baġhair majnūñ ke lailā tirā guzārā nahīñ

tamām ahl-e-adab kī ye raa.e hai 'dilbar'

ġhazal ke fan pe kisī kā koī ijārā nahīñ

yaqin kar le sar-e-sham koi chaara nahin

bina diye ke andhere tera guzara nahin

hamin hain markazi kirdar puchh lo us se

abhi tak us ne kahani mein hum ko mara nahin

badal to di hai har ek chiz us ne kamre ki

magar hamein abhi diwar se utara nahin

hamein KHabar hai ki manzil to ek hai lekin

jidhar zamana hai wo rasta hamara nahin

juda hue hain to hum ek ho bhi sakte hain

KHala hai darmiyan dariyaon ka kinara nahin

ye raaz khol diya kab ka dasht-o-sahra ne

baghair majnun ke laila tera guzara nahin

tamam ahl-e-adab ki ye rae hai 'dilbar'

ghazal ke fan pe kisi ka koi ijara nahin