yaqin KHud ko dilane mein abhi kuchh din lagenge

yaqīñ ḳhud ko dilāne meñ abhī kuchh din lageñge

tumheñ yaksar bhulāne meñ abhī kuchh din lageñge

ḳhizāñ kī shiddatoñ se ḳhāl-o-ḳhad bujh se ga.e haiñ

so phir se muskurāne meñ abhī kuchh din lageñge

yahāñ boī ga.ī haiñ dukh kī bārūdī surañgeñ

na.ī fasleñ ugāne meñ abhī kuchh din lageñge

ye bastī muddatoñ sartān kī zad meñ rahī hai

ise phir se basāne meñ abhī kuchh din lageñge

javānī ek mahbūba hai aur nārāz bhī hai

ise thoḌā manāne meñ abhī kuchh din lageñge

shu.ūr-e-zabt kā har marhala behad kaḌā hai

so tasvīreñ jalāne meñ abhī kuchh din lageñge

yaqin KHud ko dilane mein abhi kuchh din lagenge

tumhein yaksar bhulane mein abhi kuchh din lagenge

KHizan ki shiddaton se KHal-o-KHad bujh se gae hain

so phir se muskurane mein abhi kuchh din lagenge

yahan boi gai hain dukh ki barudi surangen

nai faslen ugane mein abhi kuchh din lagenge

ye basti muddaton sartan ki zad mein rahi hai

ise phir se basane mein abhi kuchh din lagenge

jawani ek mahbuba hai aur naraaz bhi hai

ise thoDa manane mein abhi kuchh din lagenge

shuur-e-zabt ka har marhala behad kaDa hai

so taswiren jalane mein abhi kuchh din lagenge