yaqin mar gaya mera guman bhi nahin bacha

yaqīn mar gayā mirā gumān bhī nahīñ bachā

kahīñ kisī ḳhayāl kā nishān bhī nahīñ bachā

ḳhamoshiyāñ tamām ġharq ho ga.iiñ ḳhalāoñ meñ

vo zalzala thā sāhibo bayān bhī nahīñ bachā

nadī ke sar pe jaise intiqām sā savār thā

ki bāñdh fasl pul bahe makān bhī nahīñ bachā

hujūm se nikal ke bach gayā udhar vo aadmī

idhar hujūm ke maiñ darmiyān bhī nahīñ bachā

zamīñ darak ga.ī sulagtī bastiyoñ kī aag se

ġhubār vo uThā ki āsmān bhī nahīñ bachā

bikhartī-TūTtī fasīl niiv ko hilā ga.ī

ki daaġh zaat par thā ḳhāndān bhī nahīñ bachā

tamām mushkiloñ ko ham ne niiñd meñ dabā diyā

khulā ye phir ki koī imtihān bhī nahīñ bachā

yaqin mar gaya mera guman bhi nahin bacha

kahin kisi KHayal ka nishan bhi nahin bacha

KHamoshiyan tamam gharq ho gain KHalaon mein

wo zalzala tha sahibo bayan bhi nahin bacha

nadi ke sar pe jaise intiqam sa sawar tha

ki bandh fasl pul bahe makan bhi nahin bacha

hujum se nikal ke bach gaya udhar wo aadmi

idhar hujum ke main darmiyan bhi nahin bacha

zamin darak gai sulagti bastiyon ki aag se

ghubar wo uTha ki aasman bhi nahin bacha

bikharti-TuTti fasil niw ko hila gai

ki dagh zat par tha KHandan bhi nahin bacha

tamam mushkilon ko hum ne nind mein daba diya

khula ye phir ki koi imtihan bhi nahin bacha