ye aaKHiri zahmat hai zara aur Thahar jaen

ye āḳhirī zahmat hai zarā aur Thahar jaa.eñ

bīmār idhar jaa.e to phir aap udhar jaa.eñ

yuuñ zulmat-e-shab meñ chamak uThte haiñ sitāre

jis tarah se ma.asūm bharī niiñd meñ Dar jaa.eñ

achchhā terī mahfil se chale jaate haiñ lekin

ye aur batā de ki kahāñ jaa.eñ kidhar jaa.eñ

ai dast-e-junūñ dīda-e-ḳhūñ-bār kī sunñā

dāman meñ jo motī haiñ kahīñ vo na bikhar jaa.eñ

is daur ke mansūr ye rakhte haiñ karāmāt

sau baar chaḌheñ daar pe sau baar utar jaa.eñ

dāman ko chhuḌā kar na ho maġhrūr idhar dekh

gar haath uThā duuñ mah-o-ḳhurshīd Thahar jaa.eñ

jam.īyat-e-ḳhātir ke liye bas hai tirā dhyān

kyoñ aise ḳhayālāt sameTūñ jo bikhar jaa.eñ

ye aaKHiri zahmat hai zara aur Thahar jaen

bimar idhar jae to phir aap udhar jaen

yun zulmat-e-shab mein chamak uThte hain sitare

jis tarah se masum bhari nind mein Dar jaen

achchha teri mahfil se chale jate hain lekin

ye aur bata de ki kahan jaen kidhar jaen

ai dast-e-junun dida-e-KHun-bar ki sunna

daman mein jo moti hain kahin wo na bikhar jaen

is daur ke mansur ye rakhte hain karamat

sau bar chaDhen dar pe sau bar utar jaen

daman ko chhuDa kar na ho maghrur idhar dekh

gar hath uTha dun mah-o-KHurshid Thahar jaen

jamiyat-e-KHatir ke liye bas hai tera dhyan

kyon aise KHayalat sameTun jo bikhar jaen