ye aish-o-ishrat-o-masti nasib-e-shah mein hai

ye 'aish-o-'ishrat-o-mastī nasīb-e-shāh meñ hai

ġharīb-e-shahr bhalā kab jalāl-o-jāh meñ hai

hai āsmāñ se pare kā mirā safar shāyad

jo māvarā-e-falak ab mirī nigāh meñ hai

kabhī Thahar jā mire paas bhī mire hamdam

ġharīb-ḳhāna mirā bhī to terī raah meñ hai

salīb-o-nok-e-sināñ aur kisī ko rusvā.ī

junūñ azal se mulavvis isī gunāh meñ hai

jo ek shaḳhs mirā jāñ-nisār thā 'mīsam'

vo ek shaḳhs bhī ab us taraf sipāh meñ hai

ye 'aish-o-'ishrat-o-masti nasib-e-shah mein hai

gharib-e-shahr bhala kab jalal-o-jah mein hai

hai aasman se pare ka mera safar shayad

jo mawara-e-falak ab meri nigah mein hai

kabhi Thahar ja mere pas bhi mere hamdam

gharib-KHana mera bhi to teri rah mein hai

salib-o-nok-e-sinan aur kisi ko ruswai

junun azal se mulawwis isi gunah mein hai

jo ek shaKHs mera jaan-nisar tha 'misam'

wo ek shaKHs bhi ab us taraf sipah mein hai