ye alag baat ki rah rah ke sada aai hai

ye alag baat ki rah rah ke sadā aa.ī hai

maiñ ne bhī ab ke na sunñe kī qasam khaa.ī hai

ab vo ik naam pukārūñ to zabāñ chhil jaa.e

haañ vahī naam ki jo hāsil-e-goyā.ī hai

raat din yaar kī galiyoñ meñ paḌā rahtā huuñ

ishq kā ishq hai rusvā.ī kī rusvā.ī hai

aisī tanhā.ī kā aalam hai ki dil Duub gayā

aur is par ye ġhazab hai terī yaad aa.ī hai

tum agar ḳhuun bhī ro.o to bhalā kyā hāsil

ham na kahte the vo laḌkī baḌī harjā.ī hai

haa.e vo āñkheñ jo raushan haiñ tasavvur meñ mire

haa.e vo shakl jo ġhazloñ meñ utar aa.ī hai

ab ye aalam hai ki ash.ār meñ ḳhuuñ thūktā huuñ

aur vo kahte haiñ faqat qāfiya-paimā.ī hai

ishq jā niklā thā phir kū-e-malāmat kī taraf

aql phir khīñch ke dīvāne ko le aa.ī hai

haa.e vo ālam-e-sad-shauq use chuum liyā

terā paiġhām jo chupke se sabā laa.ī hai

ye alag baat ki rah rah ke sada aai hai

main ne bhi ab ke na sunne ki qasam khai hai

ab wo ek nam pukarun to zaban chhil jae

han wahi nam ki jo hasil-e-goyai hai

raat din yar ki galiyon mein paDa rahta hun

ishq ka ishq hai ruswai ki ruswai hai

aisi tanhai ka aalam hai ki dil Dub gaya

aur is par ye ghazab hai teri yaad aai hai

tum agar KHun bhi roo to bhala kya hasil

hum na kahte the wo laDki baDi harjai hai

hae wo aankhen jo raushan hain tasawwur mein mere

hae wo shakl jo ghazlon mein utar aai hai

ab ye aalam hai ki ashaar mein KHun thukta hun

aur wo kahte hain faqat qafiya-paimai hai

ishq ja nikla tha phir ku-e-malamat ki taraf

aql phir khinch ke diwane ko le aai hai

hae wo aalam-e-sad-shauq use chum liya

tera paigham jo chupke se saba lai hai