ye alag baat ki ulfat ne diya kuchh bhi nahin

ye alag baat ki ulfat ne diyā kuchh bhī nahīñ

ham haiñ barbād magar us kā gila kuchh bhī nahīñ

us ne chup rah ke savāloñ ke javābāt diye

aur maiñ ne bhī sar-e-bazm kahā kuchh bhī nahīñ

dekhiye kis meñ kamī hai ki uThā.e hue haath

umr bhar uTThe rahe aur milā kuchh bhī nahīñ

sirf tanhā.ī ye ashkoñ kī jhaḌī aur aaheñ

ye to phir jurm-e-mohabbat kī sazā kuchh bhī nahīñ

bech kar ḳhud ko jo paanā thā vo paayā sab kuchh

aur paayā to khulā is meñ mirā kuchh bhī nahīñ

paane aur khone kī ye kaun-sī manzil hai ki ab

haath uTThe haiñ magar dil meñ duā kuchh bhī nahīñ

ye alag baat ki ulfat ne diya kuchh bhi nahin

hum hain barbaad magar us ka gila kuchh bhi nahin

us ne chup rah ke sawalon ke jawabaat diye

aur main ne bhi sar-e-bazm kaha kuchh bhi nahin

dekhiye kis mein kami hai ki uThae hue hath

umr bhar uTThe rahe aur mila kuchh bhi nahin

sirf tanhai ye ashkon ki jhaDi aur aahen

ye to phir jurm-e-mohabbat ki saza kuchh bhi nahin

bech kar KHud ko jo pana tha wo paya sab kuchh

aur paya to khula is mein mera kuchh bhi nahin

pane aur khone ki ye kaun-si manzil hai ki ab

hath uTThe hain magar dil mein dua kuchh bhi nahin