ye arman jab tak machalte rahenge

ye armān jab tak machalte raheñge

hazāroñ hī ġham dil meñ palte raheñge

sadā haath sachchā.ī kā ham ne thāmā

ḳhabar kyā thī baazū hī galte raheñge

salāmat raheñgī ye sāñseñ jahāñ tak

nigāhoñ meñ ham sab kī khalte raheñge

siyāsat kī baazī vatan noch legī

kafan uf shahīdoñ ke Dhalte raheñge

bahut talḳh lahja hai duniyā kā yaaro

kahāñ tak bhalā yuuñ hī jalte raheñge

nasīboñ se milte haiñ ġham ye samajh kar

faqat ḳhud ko ḳhud se hī chhalte raheñge

kabhī 'sārthī' tū qadam roknā mat

ye chhāle to yuuñ hī ubalte raheñge

ye arman jab tak machalte rahenge

hazaron hi gham dil mein palte rahenge

sada hath sachchai ka hum ne thama

KHabar kya thi bazu hi galte rahenge

salamat rahengi ye sansen jahan tak

nigahon mein hum sab ki khalte rahenge

siyasat ki bazi watan noch legi

kafan uf shahidon ke Dhalte rahenge

bahut talKH lahja hai duniya ka yaro

kahan tak bhala yun hi jalte rahenge

nasibon se milte hain gham ye samajh kar

faqat KHud ko KHud se hi chhalte rahenge

kabhi 'sarthi' tu qadam rokna mat

ye chhaale to yun hi ubalte rahenge