ye aur baat ki aansu baha nahin sakte

ye aur baat ki aañsū bahā nahīñ sakte

bichhaḌ ke tujh se magar muskurā nahīñ sakte

amiir baap ke beToñ ko sharm aatī hai

kisī kī raah kā patthar haTā nahīñ sakte

ham āftāb kī bastī ke rahne vaale haiñ

hameñ havāoñ ke jhoñke bujhā nahīñ sakte

yahī ilāqa to shahbāz kā ilāqa hai

yahāñ chhatoñ pe kabūtar uḌā nahīñ sakte

vo be-gunāhoñ kā qātil hai qatl hī hogā

farishte us kī hifāzat ko aa nahīñ sakte

mushāhidoñ kā asāsa agar salāmat hai

purāne log na.e zaḳhm khā nahīñ sakte

hameñ to is liye sahnā hai muflisī kā azaab

zamīr bech ke daulat kamā nahīñ sakte

hamārī raah meñ chaTTān ho ki dariyā ho

baḌhā diye haiñ qadam to haTā nahīñ sakte

hamāre saath duāoñ ke qāfile haiñ 'riyāz'

hamārī raah meñ tūfān aa nahīñ sakte

ye aur baat ki aansu baha nahin sakte

bichhaD ke tujh se magar muskura nahin sakte

amir bap ke beTon ko sharm aati hai

kisi ki rah ka patthar haTa nahin sakte

hum aaftab ki basti ke rahne wale hain

hamein hawaon ke jhonke bujha nahin sakte

yahi ilaqa to shahbaz ka ilaqa hai

yahan chhaton pe kabutar uDa nahin sakte

wo be-gunahon ka qatil hai qatl hi hoga

farishte us ki hifazat ko aa nahin sakte

mushahidon ka asasa agar salamat hai

purane log nae zaKHm kha nahin sakte

hamein to is liye sahna hai muflisi ka azab

zamir bech ke daulat kama nahin sakte

hamari rah mein chaTTan ho ki dariya ho

baDha diye hain qadam to haTa nahin sakte

hamare sath duaon ke qafile hain 'riyaz'

hamari rah mein tufan aa nahin sakte