ye aur baat ki taKHir se alag karunga

ye aur baat ki tāḳhīr se alag karūñgā

magar tujhe tirī tasvīr se alag karūñgā

musāfirat se jo fursat huī nasīb to phir

thakan ko paañv kī zanjīr se alag karūñgā

jo mere dā.imī ehsās se juḌā hai sabaq

maiñ kis tarah use tahrīr se alag karūñgā

kuñvāre ḳhvāb hue jā rahe haiñ āvāra

unheñ maiñ lazzat-e-ta.abīr se alag karūñgā

utārnā hai mujhe ab anā ko maut ke ghaaT

so us ko lahja-e-shamshīr se alag karūñgā

mire badan meñ lagī hai jo hijr kī dīmak

maiñ us ko vasl kī tadbīr se alag karūñgā

rivāyatoñ se rakhūñgā maiñ 'faiz' rishta magar

suḳhan zarā sā taqī-'mīr' se alag karūñgā

ye aur baat ki taKHir se alag karunga

magar tujhe teri taswir se alag karunga

musafirat se jo fursat hui nasib to phir

thakan ko panw ki zanjir se alag karunga

jo mere daimi ehsas se juDa hai sabaq

main kis tarah use tahrir se alag karunga

kunware KHwab hue ja rahe hain aawara

unhen main lazzat-e-tabir se alag karunga

utarna hai mujhe ab ana ko maut ke ghaT

so us ko lahja-e-shamshir se alag karunga

mere badan mein lagi hai jo hijr ki dimak

main us ko wasl ki tadbir se alag karunga

riwayaton se rakhunga main 'faiz' rishta magar

suKHan zara sa taqi-'mir' se alag karunga