ye aur baat shajar sar-nigun paDa hua tha

ye aur baat shajar sar-nigūñ paḌā huā thā

zamīñ se us ne magar rābta rakhā huā thā

vahīñ vahīñ se gavāhī milī mire sach kī

jahāñ jahāñ se mirā pairahan phaTā huā thā

mujhe kisī kā to honā thā haar jiit ke ba.ad

mirā vajūd vahāñ daav par lagā huā thā

mirī nigāh meñ thī surḳh mahmaloñ kī qatār

aur in meñ ek kajāva bahut sajā huā thā

añdhere noch rahe the jamāl dhartī kā

mirī zamīn kā sūraj kahīñ gayā huā thā

mire huzūr farishte jhukā.e jā rahe the

mirā ḳhamīr abhī chaak par rakhā huā thā

laraz rahe the kamānoñ meñ tiir dahshat se

mire 'husain' kā 'asġhar' kahāñ Darā huā thā

ye aur baat shajar sar-nigun paDa hua tha

zamin se us ne magar rabta rakha hua tha

wahin wahin se gawahi mili mere sach ki

jahan jahan se mera pairahan phaTa hua tha

mujhe kisi ka to hona tha haar jit ke baad

mera wajud wahan daw par laga hua tha

meri nigah mein thi surKH mahmalon ki qatar

aur in mein ek kajawa bahut saja hua tha

andhere noch rahe the jamal dharti ka

meri zamin ka suraj kahin gaya hua tha

mere huzur farishte jhukae ja rahe the

mera KHamir abhi chaak par rakha hua tha

laraz rahe the kamanon mein tir dahshat se

mere 'husain' ka 'asghar' kahan Dara hua tha