ye aur baat tere dil mein ghar nahin karunga

ye aur baat tire dil meñ ghar nahīñ karūñgā

par is maqām se aage safar nahīñ karūñgā

duā.eñ kyā duuñ use zindagī kī itnā hai

maiñ zahr huuñ magar us par asar nahīñ karūñgā

kisī se jhūTī mohabbat kisī se sachchā bair

maiñ kar to saktā huuñ ye sab magar nahīñ karūñgā

davām baḳhsh to saktā huuñ ḳhāmushī ko magar

ye kaam maiñ kisī āvāz par nahīñ karūñgā

kiyā jo vaqt par us kā ma.aal dekh chukā

koī bhī kaam maiñ ab vaqt par nahīñ karūñgā

guzār dūñgā maiñ apne firāq meñ ḳhud ko

ḳhud apne hone kī ḳhud ko ḳhabar nahīñ karūñgā

ye aur baat tere dil mein ghar nahin karunga

par is maqam se aage safar nahin karunga

duaen kya dun use zindagi ki itna hai

main zahr hun magar us par asar nahin karunga

kisi se jhuTi mohabbat kisi se sachcha bair

main kar to sakta hun ye sab magar nahin karunga

dawam baKHsh to sakta hun KHamushi ko magar

ye kaam main kisi aawaz par nahin karunga

kiya jo waqt par us ka maal dekh chuka

koi bhi kaam main ab waqt par nahin karunga

guzar dunga main apne firaq mein KHud ko

KHud apne hone ki KHud ko KHabar nahin karunga