ye baje ye gaje ye mele ye Thele

ye baaje ye gaaje ye mele ye Thele

ye sab jiite jī ke haiñ saare jhamele

zabāñ pe mirī qufl hī lag gayā jo

mile bhī kahīñ vo akele-dukele

yaqīnan vo insān bār-e-zamīñ hai

phalī phoḌ kar jo na de dukh na jhele

vo miskīn sūrat nazar bholī-bhālī

magar baat aisī ki bas chuTkī le le

vo but aaj be-tarh gum-sum banā hai

na kuchh muñh se bole na kuchh sar se khele

tumhārī mohabbat meñ ai jaan ham ne

sadā dukh hī jhele haiñ pāpaḌ hī bele

girah do girah kī lañgoTī meñ ham sab

rahe mast-o-be-ḳhud sadā phaag khele

nachāyā hai vo naach tignī kā tum ne

ki insān se ban ga.e ham bhuñDele

nahīñ shā'irī meñ huā koī ham-sar

na aire na ġhaire na Milton na Shelley

tumhārī talavvun-mizājī ke sadqe

gahe shahd ho gaah kaḌve karele

'zarīf' aap kā rang hai sab se chokhā

zarāfat meñ haiñ aap 'akbar' ke chele

ye baje ye gaje ye mele ye Thele

ye sab jite ji ke hain sare jhamele

zaban pe meri qufl hi lag gaya jo

mile bhi kahin wo akele-dukele

yaqinan wo insan bar-e-zamin hai

phali phoD kar jo na de dukh na jhele

wo miskin surat nazar bholi-bhaali

magar baat aisi ki bas chuTki le le

wo but aaj be-tarh gum-sum bana hai

na kuchh munh se bole na kuchh sar se khele

tumhaari mohabbat mein ai jaan hum ne

sada dukh hi jhele hain papaD hi bele

girah do girah ki langoTi mein hum sab

rahe mast-o-be-KHud sada phag khele

nachaya hai wo nach tigni ka tum ne

ki insan se ban gae hum bhunDele

nahin sha'iri mein hua koi ham-sar

na aire na ghaire na Milton na Shelley

tumhaari talawwun-mizaji ke sadqe

gahe shahd ho gah kaDwe karele

'zarif' aap ka rang hai sab se chokha

zarafat mein hain aap 'akbar' ke chele