یہ بار بار کا بہتان ہم پہ جھوٹا ہے

یہ بار بار کا بہتان ہم پہ جھوٹا ہے

ہمارا دل تو فقط ایک بار ٹوٹا ہے

وہ سنگلاخ چٹانیں ہمارے اندر ہیں

ہماری آنکھ کا چشمہ وہیں سے پھوٹا ہے

خوشی غمی میں برابر شریک ہوتے ہیں

چمن کے حال سے واقف ہر ایک بوٹا ہے

گلہ گزار ہوں میں دشمنوں سے اس لیے بھی

مجھے ہمیشہ مرے دوستوں نے لوٹا ہے

وہ جیسے مچھلی نکلتی ہے آ کے کانٹے سے

ہمارے ہاتھ سے دامن قضا کا چھوٹا ہے

ملے ہیں کتنے ہی قد کاٹھ والے لوگوں سے

جسے بھی دیکھیے اندر سے وہ زکوٹا ہے

لگے گی دیر تناور درخت بننے میں

ابھی تو ہجر یہ پروان چڑھتا بوٹا ہے

کہیں دراڑ وہ غم کا پہاڑ ٹوٹنے کی

زمین ٹوٹی ہے نہ آسمان ٹوٹا ہے