ye baat dasht-e-wafa ki nahin chaman ki hai

ye baat dasht-e-vafā kī nahīñ chaman kī hai

chaman kī baat bhī zaḳhmoñ ke pairahan kī hai

havā-e-shahr bahut ajnabī sahī lekin

ye us meñ bū-e-vafā terī anjuman kī hai

maiñ but-tarāsh huuñ patthar se kaam hai mujh ko

magar ye tarz-e-adā tere bāñkpan kī hai

lapak to sho.ala kī fitrat hai phir bhī kyā kiije

ki is meñ phuul sī rañgat tere badan kī hai

ye merī vādī-e-jāñ nāg-phan kā jañgal hai

ye ḳhushbuoñ kī ridā shāḳh-e-yāsman kī hai

mere junūñ kī sazā sañgsār honā hai

lahū lahū ye qabā kyuuñ nigār-e-fan kī hai

ye dil to sho.ala-e-afsurda hai magar 'tanvīr'

mirī ragoñ meñ tapish garmī-e-suḳhan kī hai

ye baat dasht-e-wafa ki nahin chaman ki hai

chaman ki baat bhi zaKHmon ke pairahan ki hai

hawa-e-shahr bahut ajnabi sahi lekin

ye us mein bu-e-wafa teri anjuman ki hai

main but-tarash hun patthar se kaam hai mujh ko

magar ye tarz-e-ada tere bankpan ki hai

lapak to shoala ki fitrat hai phir bhi kya kije

ki is mein phul si rangat tere badan ki hai

ye meri wadi-e-jaan nag-phan ka jangal hai

ye KHushbuon ki rida shaKH-e-yasman ki hai

mere junun ki saza sangsar hona hai

lahu lahu ye qaba kyun nigar-e-fan ki hai

ye dil to shoala-e-afsurda hai magar 'tanwir'

meri ragon mein tapish garmi-e-suKHan ki hai