ye barf-zar badan se na jaan se niklega

ye barf-zār badan se na jaañ se niklegā

lahū ho sard to sho.ala kahāñ se niklegā

hazār ghere rahe jabr kā hisār-e-siyah

ki bāb-e-rāh-e-amāñ darmiyāñ se niklegā

jo talḳh harf pas-e-lab hai 'aam bhī hogā

chaḌhā hai tiir to āḳhir kamāñ se niklegā

jo peḌ phal nahīñ dete vo kāTte jaao

ḳhizāñ kā zahr yūñhī gulsitāñ se niklegā

zarā chale to sahī pāniyoñ pe tez havā

khaḌā safīna khule bādbāñ se niklegā

koī to kaam lo ġham se rageñ hī chamkāo

jaleñgī sham'eñ añdherā makāñ se niklegā

khule haiñ rāstoñ ke bhed tū samajh 'shāhīñ'

ye kārvāñ safar-e-rā.egāñ se niklegā

ye barf-zar badan se na jaan se niklega

lahu ho sard to shoala kahan se niklega

hazar ghere rahe jabr ka hisar-e-siyah

ki bab-e-rah-e-aman darmiyan se niklega

jo talKH harf pas-e-lab hai 'am bhi hoga

chaDha hai tir to aaKHir kaman se niklega

jo peD phal nahin dete wo kaTte jao

KHizan ka zahr yunhi gulsitan se niklega

zara chale to sahi paniyon pe tez hawa

khaDa safina khule baadban se niklega

koi to kaam lo gham se ragen hi chamkao

jalengi sham'en andhera makan se niklega

khule hain raston ke bhed tu samajh 'shahin'

ye karwan safar-e-raegan se niklega