ye be-mausam jo purwai bahut hai

ye be-mausam jo purvā.ī bahut hai

surūr-e-dard-e-tanhā.ī bahut hai

sharīk-e-ġham na ho koī to achchhā

akelī ho to tanhā.ī bahut hai

abas shikva kī būñdeñ DhūñDhte ho

mire hoñToñ kī gahrā.ī bahut hai

to kyā maiñ dushmanoñ meñ aa gayā huuñ

yahāñ to shor-e-paspā.ī bahut hai

vo chaltā hai hamesha bhiiḌ le kar

use ehsās-e-tanhā.ī bahut hai

tumhārī yaad kitnī bā-vafā hai

ki jab aa.ī hai to aa.ī bahut hai

kahā thā tum ne tanhā.ī meñ milnā

ab aa jaao ki tanhā.ī bahut hai

tum ab 'saulat' kaho kuchh shoḳh ġhazleñ

jo dil ne lī vo añgḌā.ī bahut hai

ye be-mausam jo purwai bahut hai

surur-e-dard-e-tanhai bahut hai

sharik-e-gham na ho koi to achchha

akeli ho to tanhai bahut hai

abas shikwa ki bunden DhunDhte ho

mere honTon ki gahrai bahut hai

to kya main dushmanon mein aa gaya hun

yahan to shor-e-paspai bahut hai

wo chalta hai hamesha bhiD le kar

use ehsas-e-tanhai bahut hai

tumhaari yaad kitni ba-wafa hai

ki jab aai hai to aai bahut hai

kaha tha tum ne tanhai mein milna

ab aa jao ki tanhai bahut hai

tum ab 'saulat' kaho kuchh shoKH ghazlen

jo dil ne li wo angDai bahut hai