ye bedad-e-bahaar-e-fitna-saman kaun dekhega

ye bedād-e-bahār-e-fitna-sāmāñ kaun dekhegā

bharī barsāt meñ jaltā gulistāñ kaun dekhegā

bachā lenā to mumkin hai bhañvar se apnī kashtī ko

jo poshīda ho sāhil meñ vo tūfāñ kaun dekhegā

sar-e-mahfil to parvānoñ ko jaltā sab ne dekhā hai

tirā soz-e-darūñ ai sham.a-e-giryāñ kaun dekhegā

lahū se likh to dī tārīḳh-e-āzādī asīroñ ne

kise fursat dar-o-dīvār-e-zindāñ kaun dekhegā

gul-afshānī to kartī hai hamārī chashm-e-tar lekin

is andhe shahar meñ taz.īn-e-dāmāñ kaun dekhegā

na ho ābād rindoñ se jo terī anjuman saaqī

tere dast-e-karam ke jūd-o-ehsāñ kaun dekhegā

yahāñ to fikr hai 'bahzād' apne hī garebāñ kī

faqīr-e-shahr kā chāk-e-garebāñ kaun dekhegā

ye bedad-e-bahaar-e-fitna-saman kaun dekhega

bhari barsat mein jalta gulistan kaun dekhega

bacha lena to mumkin hai bhanwar se apni kashti ko

jo poshida ho sahil mein wo tufan kaun dekhega

sar-e-mahfil to parwanon ko jalta sab ne dekha hai

tera soz-e-darun ai shama-e-giryan kaun dekhega

lahu se likh to di tariKH-e-azadi asiron ne

kise fursat dar-o-diwar-e-zindan kaun dekhega

gul-afshani to karti hai hamari chashm-e-tar lekin

is andhe shahar mein tazin-e-daman kaun dekhega

na ho aabaad rindon se jo teri anjuman saqi

tere dast-e-karam ke jud-o-ehsan kaun dekhega

yahan to fikr hai 'bahzad' apne hi gareban ki

faqir-e-shahr ka chaak-e-gareban kaun dekhega