ye bhi kya hijr ke maron ki pazirai hai

ye bhī kyā hijr ke māroñ kī pazīrā.ī hai

‘itr-e-mahtāb lagā.e hue raat aa.ī hai

rū-e-har-gul meñ mujhe us kī shabāhat aa.e

phuul jhūTe haiñ ki jhūTī mirī bīnā.ī hai

jazr-o-mad rangoñ ke dekho to pareshān na ho

us kī āñkhoñ kī samundar se shanāsā.ī hai

kam se kam us se tirā vasl ujāgar hotā

vo jo tasvīr hamāre liye banvā.ī hai

yuuñ bhī kyā hotā hai e'lān shikast-e-dil kā

tujh se baḌh kar to sitamgar tirī shahnā.ī hai

hai hasīñ itnā tirā shahr ki is meñ rahnā

ham ġharīboñ ke liye bā’is-e-rusvā.ī hai

ye bhi kya hijr ke maron ki pazirai hai

‘itr-e-mahtab lagae hue raat aai hai

ru-e-har-gul mein mujhe us ki shabahat aae

phul jhuTe hain ki jhuTi meri binai hai

jazr-o-mad rangon ke dekho to pareshan na ho

us ki aankhon ki samundar se shanasai hai

kam se kam us se tera wasl ujagar hota

wo jo taswir hamare liye banwai hai

yun bhi kya hota hai e'lan shikast-e-dil ka

tujh se baDh kar to sitamgar teri shahnai hai

hai hasin itna tera shahr ki is mein rahna

hum gharibon ke liye ba’is-e-ruswai hai