ye bhi mumkin hai miyan aankh bhigone lag jaun

ye bhī mumkin hai miyāñ aañkh bhigone lag jā.ūñ

vo kahe kaise ho tum aur maiñ rone lag jā.ūñ

ai mirī aañkh meñ Thahrā.e hue vasl ke ḳhvāb

meñ tavātur se tire saath na sone lag jā.ūñ

mujh ko har chiiz mayassar hai mohabbat meñ so ab

rā.egānī maiñ tire daaġh na dhone lag jā.ūñ

itnī ḳhush-fahmī meñ nuqsān na ho jaa.e kahīñ

maiñ koī paa.ī huī chiiz na khone lag jā.ūñ

jā-ba-jā bikhre hue haiñ mire ḳhvāb aur ḳhayāl

maiñ ye sāmān kahīñ aur na Dhone lag jā.ūñ

jhiil meñ paañv utāre haiñ kisī ne 'ejāz'

kyoñ na ab maiñ bhī yahāñ haath Dubone lag jā.ūñ

ye bhi mumkin hai miyan aankh bhigone lag jaun

wo kahe kaise ho tum aur main rone lag jaun

ai meri aankh mein Thahrae hue wasl ke KHwab

mein tawatur se tere sath na sone lag jaun

mujh ko har chiz mayassar hai mohabbat mein so ab

raegani main tere dagh na dhone lag jaun

itni KHush-fahmi mein nuqsan na ho jae kahin

main koi pai hui chiz na khone lag jaun

ja-ba-ja bikhre hue hain mere KHwab aur KHayal

main ye saman kahin aur na Dhone lag jaun

jhil mein panw utare hain kisi ne 'ejaz'

kyon na ab main bhi yahan hath Dubone lag jaun