ye bhi qissa tamam kar aaya

ye bhī qissa tamām kar aayā

aaj chaukhaT pe jaan dhar aayā

vo jo ik ghar thā mere purkhoñ kā

mere hisse meñ kab vo ghar aayā

kis tamannā se ghar se niklā thā

par mujhe raas kab safar aayā

imtihāñ ḳhatm hī nahīñ hote

kitne maqtal maiñ paar kar aayā

chāhateñ bāñTīñ nafrateñ pā.īñ

biij kyā boyā kyā samar aayā

de ke āvāz har taraf tujh ko

har taraf se maiñ be-ḳhabar aayā

dil kisī ḳhauf se agar dhaḌkā

lab pe ik naam be-ḳhatar aayā

terī nisbat se mere kāġhaz par

harf jo aayā mo'atabar aayā

dil mohalle se jab bhī guzrā 'adīl'

tū hī galiyoñ meñ bas nazar aayā

ye bhi qissa tamam kar aaya

aaj chaukhaT pe jaan dhar aaya

wo jo ek ghar tha mere purkhon ka

mere hisse mein kab wo ghar aaya

kis tamanna se ghar se nikla tha

par mujhe ras kab safar aaya

imtihan KHatm hi nahin hote

kitne maqtal main par kar aaya

chahaten banTin nafraten pain

bij kya boya kya samar aaya

de ke aawaz har taraf tujh ko

har taraf se main be-KHabar aaya

dil kisi KHauf se agar dhaDka

lab pe ek nam be-KHatar aaya

teri nisbat se mere kaghaz par

harf jo aaya mo'atabar aaya

dil mohalle se jab bhi guzra 'adil'

tu hi galiyon mein bas nazar aaya