ye bhi rawish kya KHub hai sachchi KHushi ke waste

ye bhī ravish kyā ḳhuub hai sachchī ḳhushī ke vāste

jiinā kisī ke vāste marnā kisī ke vāste

lāzim haiñ dūr-andeshiyāñ ik falsafī ke vāste

fikr-o-nazar darkār haiñ dānishvarī ke vāste

jab tak na ho irfān-e-zāt idrāk-e-ālam kuchh nahīñ

yā-rab basīrat kar atā ḳhud-āgahī ke vāste

ahl-e-ḳhirad se hal na hoñge zindagī ke mas.ale

ahl-e-junūñ ko DhūñD is dard-e-sarī ke vāste

hote rahoge tā-ba-ke sharminda-e-ehsān-e-ġhair

yaaro yahāñ kī chand-roza zindagī ke vāste

donoñ haiñ afsurda-dil āzurda-nazar āshufta-hāl

ik be-ḳhudī ke vāste aur ik ḳhudī ke vāste

kis darja pur-asrār hotā jā rahā hai in dinoñ

ik mas.ala hai aadmī ḳhud aadmī ke vāste

mujh ko kisī kī zaat se kyā lenā denā hai magar

koshāñ huuñ maiñ to ittihād-e-bāhamī ke vāste

'rahbar' na hogā shabnam-afshānī se bār-āvar ye baaġh

ḳhūn-e-jigar kī hai zarūrat shā.erī ke vāste

ye bhi rawish kya KHub hai sachchi KHushi ke waste

jina kisi ke waste marna kisi ke waste

lazim hain dur-andeshiyan ek falsafi ke waste

fikr-o-nazar darkar hain danishwari ke waste

jab tak na ho irfan-e-zat idrak-e-alam kuchh nahin

ya-rab basirat kar ata KHud-agahi ke waste

ahl-e-KHirad se hal na honge zindagi ke masale

ahl-e-junun ko DhunD is dard-e-sari ke waste

hote rahoge ta-ba-ke sharminda-e-ehsan-e-ghair

yaro yahan ki chand-roza zindagi ke waste

donon hain afsurda-dil aazurda-nazar aashufta-haal

ek be-KHudi ke waste aur ek KHudi ke waste

kis darja pur-asrar hota ja raha hai in dinon

ek masala hai aadmi KHud aadmi ke waste

mujh ko kisi ki zat se kya lena dena hai magar

koshan hun main to ittihad-e-bahami ke waste

'rahbar' na hoga shabnam-afshani se bar-awar ye bagh

KHun-e-jigar ki hai zarurat shaeri ke waste