ye dil har ek nai koshish pe yun dhaDakta hai

ye dil har ik na.ī koshish pe yuuñ dhaḌaktā hai

ki jaise koī natīja nikalne vaalā hai

hameñ ḳhabar hai ki hai kaun kitne paanī meñ

ye shahr sat.h-e-samandar se kitnā ūñchā hai

sarāb pyaas bujhātā nahīñ kabhī lekin

ye baat ḳhuub samajhtā hai kaun pyāsā hai

tumhāre haath meñ taqdīr hai ujāloñ kī

charāġh ko ye ḳhabar kyā kahāñ añdherā hai

sunā.ī detī hai ab sirf āñsuoñ kī sadā

nigāh par bhī ka.ī din se saḳht pahrā hai

na dostī hī ko parkhā na dushmanī ko 'shakīl'

magar ye kis ne kahā tajraba adhūrā hai

ye dil har ek nai koshish pe yun dhaDakta hai

ki jaise koi natija nikalne wala hai

hamein KHabar hai ki hai kaun kitne pani mein

ye shahr sath-e-samandar se kitna uncha hai

sarab pyas bujhata nahin kabhi lekin

ye baat KHub samajhta hai kaun pyasa hai

tumhaare hath mein taqdir hai ujalon ki

charagh ko ye KHabar kya kahan andhera hai

sunai deti hai ab sirf aansuon ki sada

nigah par bhi kai din se saKHt pahra hai

na dosti hi ko parkha na dushmani ko 'shakil'

magar ye kis ne kaha tajraba adhura hai