ye dil nahīñ nuur kā hai sho.ala kisī ko is se zarar nahīñ hai
misāl barq-o-sharar hai lekin mizāj barq-o-sharar nahīñ hai
hai rū-kash-e-āftāb zarra baġhair parda bilā-vasīla
vahāñ lagā.ī hai aañkh dil ne jahāñ majāl-e-nazar nahīñ hai
haram se nikle talāsh-e-but meñ butoñ se yād-e-ḳhudā pe bigḌī
ġharaz ham āvāra-e-vafā haiñ kahīñ hamārā guzar nahīñ hai
jo dekhne vaale dekhte haiñ vo sunñe vāloñ se kyā batā.eñ
nazar ko zauq-e-zabāñ nahīñ hai zabāñ ko zauq-e-nazar nahīñ hai
azaañ ho nāqūs yā jaras ho muassar apnī jagah pe sab haiñ
magar jahāñ maiñ pahuñch gayā huuñ vahāñ kisī kā asar nahīñ hai
vo nīchī nazreñ thiiñ dil kī tālib vafā ne go jaan nazr kar dī
magar asar jo savāl meñ thā javāb meñ vo asar nahīñ hai
suḳhan mirā kaif-e-dil hai 'nātiq' vo qadr karte haiñ jo ho āshiq
nahīñ hai ye falsafa kitābī ye iktisābī hunar nahīñ hai
ye dil nahin nur ka hai shoala kisi ko is se zarar nahin hai
misal barq-o-sharar hai lekin mizaj barq-o-sharar nahin hai
hai ru-kash-e-aftab zarra baghair parda bila-wasila
wahan lagai hai aankh dil ne jahan majal-e-nazar nahin hai
haram se nikle talash-e-but mein buton se yaad-e-KHuda pe bigDi
gharaz hum aawara-e-wafa hain kahin hamara guzar nahin hai
jo dekhne wale dekhte hain wo sunne walon se kya bataen
nazar ko zauq-e-zaban nahin hai zaban ko zauq-e-nazar nahin hai
azan ho naqus ya jaras ho muassar apni jagah pe sab hain
magar jahan main pahunch gaya hun wahan kisi ka asar nahin hai
wo nichi nazren thin dil ki talib wafa ne go jaan nazr kar di
magar asar jo sawal mein tha jawab mein wo asar nahin hai
suKHan mera kaif-e-dil hai 'natiq' wo qadr karte hain jo ho aashiq
nahin hai ye falsafa kitabi ye iktisabi hunar nahin hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.