ye dil tha pesh hamesha sar-e-masafat-e-ishq

ye dil thā pesh hamesha sar-e-masāfat-e-ishq

junūñ talak hī lihāzā milī ijāzat-e-ishq

ḳhat-e-shikasta meñ kyā jaane kab kashīd aa jaa.e

ki saañs rok ke kariyo miyāñ kitābat-e-ishq

har ik nafas hai muhājir ki aarzī hai qiyām

so shahriyat nahīñ detī hai ik riyāsat-e-ishq

ye būd-o-bāsh alag to nahīñ hai merī tirī

lahū ke rang meñ yaksāñ hai jab saqāfat-e-ishq

vo phuul ho ki sitāra vo shaam ho ki charāġh

kabhī kabhī to bahut kam paḌī vazāhat-e-ishq

Dhalī jo shaam to kyoñ dil huā udaas mirā

maiñ jāntā hī na thā jab koī alāmat-e-ishq

jab ek raat mujhe ḳhvāb ik dikhāyā gayā

tamām ho ga.ī us raat sab riyāzat-e-ishq

phir ek sub.h mujhe niiñd se uThāyā gayā

uThā ke mujh ko atā kī ga.ī niyābat-e-ishq

bahut se kaam kiye maiñ ne zindagī meñ magar

jo ek sajda adā ho gayā ba-hālat-e-ishq

ye dil tha pesh hamesha sar-e-masafat-e-ishq

junun talak hi lihaza mili ijazat-e-ishq

KHat-e-shikasta mein kya jaane kab kashid aa jae

ki sans rok ke kariyo miyan kitabat-e-ishq

har ek nafas hai muhajir ki aarzi hai qiyam

so shahriyat nahin deti hai ek riyasat-e-ishq

ye bud-o-bash alag to nahin hai meri teri

lahu ke rang mein yaksan hai jab saqafat-e-ishq

wo phul ho ki sitara wo sham ho ki charagh

kabhi kabhi to bahut kam paDi wazahat-e-ishq

Dhali jo sham to kyon dil hua udas mera

main jaanta hi na tha jab koi alamat-e-ishq

jab ek raat mujhe KHwab ek dikhaya gaya

tamam ho gai us raat sab riyazat-e-ishq

phir ek subh mujhe nind se uThaya gaya

uTha ke mujh ko ata ki gai niyabat-e-ishq

bahut se kaam kiye main ne zindagi mein magar

jo ek sajda ada ho gaya ba-haalat-e-ishq