ye duniya aani-jaani hai koi daim nahin rahta

ye duniyā ānī-jānī hai koī daa.im nahīñ rahtā

sadā ḳhushiyāñ nahīñ rahtīñ hamesha ġham nahīñ rahtā

lahū ko garm rakhtī hai masā.il kī girāñ-bārī

dil-e-murda use kahiye ki jis meñ ġham nahīñ rahtā

yahī bastī hai jis ke har galī kūche se nisbat thī

magar ab yaañ koī hamdam koī mahram nahīñ rahtā

nikal ab apne maskan se muqaddar hai tirā hijrat

ki dariyā apne maḳhraj par bhī to qaa.em nahīñ rahtā

badaltī rahtī haiñ qadreñ badal jaatī haiñ tahzībeñ

zamāna ek maslak par sadā qaa.em nahīñ rahtā

zabāneñ irtiqā kī manziloñ se jab guzartī haiñ

bahut se lafz kaT jaate haiñ jin meñ dam nahīñ rahtā

'sarosh' āḳhir yahāñ kis kis ke dar par dastakeñ doge

yahāñ aġhyār baste haiñ koī mahram nahīñ rahtā

ye duniya aani-jaani hai koi daim nahin rahta

sada KHushiyan nahin rahtin hamesha gham nahin rahta

lahu ko garm rakhti hai masail ki giran-bari

dil-e-murda use kahiye ki jis mein gham nahin rahta

yahi basti hai jis ke har gali kuche se nisbat thi

magar ab yan koi hamdam koi mahram nahin rahta

nikal ab apne maskan se muqaddar hai tera hijrat

ki dariya apne maKHraj par bhi to qaem nahin rahta

badalti rahti hain qadren badal jati hain tahziben

zamana ek maslak par sada qaem nahin rahta

zabanen irtiqa ki manzilon se jab guzarti hain

bahut se lafz kaT jate hain jin mein dam nahin rahta

'sarosh' aaKHir yahan kis kis ke dar par dastaken doge

yahan aghyar baste hain koi mahram nahin rahta