ye ehtiyat ishq pe lazim sada rahe

ye ehtiyāt ishq pe lāzim sadā rahe

har-chand qurbateñ hoñ magar fāsla rahe

hājat nahīñ ki jām-o-subū mai-kada rahe

dil kā tirī nigāh se bas rābta rahe

māh-o-nujūm-o-shams kī tham jaa.eñ gardisheñ

Thahre tirī nazar to zamāna rukā rahe

ma.amūr ḳhushbūoñ se rahe gulshan-e-vajūd

bas ik tujhī ko zehn agar sochtā rahe

rānā.i-e-jamāl kā aalam na pūchhiye

ik baar dekh le jo use dekhtā rahe

fariyād le ke jaa.eñ bhī ahl-e-chaman kahāñ

jab bāġhbāñ ḳhud apnā chaman lūTtā rahe

kuchh der aur ai shab-e-hijrāñ Thahar abhī

kuchh der aur dard kā tūfāñ uThā rahe

ye ehtiyat ishq pe lazim sada rahe

har-chand qurbaten hon magar fasla rahe

hajat nahin ki jam-o-subu mai-kada rahe

dil ka teri nigah se bas rabta rahe

mah-o-nujum-o-shams ki tham jaen gardishen

Thahre teri nazar to zamana ruka rahe

mamur KHushbuon se rahe gulshan-e-wajud

bas ek tujhi ko zehn agar sochta rahe

ranai-e-jamal ka aalam na puchhiye

ek bar dekh le jo use dekhta rahe

fariyaad le ke jaen bhi ahl-e-chaman kahan

jab baghban KHud apna chaman luTta rahe

kuchh der aur ai shab-e-hijran Thahar abhi

kuchh der aur dard ka tufan uTha rahe