ye fan ye ilm-o-adab banTana hamare baad

ye fan ye ilm-o-adab bāñTanā hamāre baa'd

hamāre naam ko mat pūjnā hamāre baa'd

haiñ dost itne magar saath kaun detā hai

kisī ko aazmā ke dekhnā hamāre baa'd

batā.eñge tumheñ vo ahl-e-adab ahl-e-qalam

hamāre baare meñ tum pūchhnā hamāre baa'd

abhī to rahne do jaisā bhī ghar kā naqsha hai

hamārī gaddī pe tum baiThnā hamāre baa'd

vabāl koī bhī aa.e to hausla rakhnā

hamāre naqsh-e-qadam DhūñDhnā hamāre baa'd

abhī to aish karo sar-parast zinda hai

pe ḳhvāhishāt ko tum roknā hamāre baa'd

abhī to zinda haiñ aa kar milā karo yaaro

jo bhūlnā hai hameñ bhūlnā hamāre baa'd

jo aaj karte haiñ ham ko 'shafaq' nazar-andāz

kareñge yaad hameñ dekhnā hamāre baa'd

ye fan ye ilm-o-adab banTana hamare ba'd

hamare nam ko mat pujna hamare ba'd

hain dost itne magar sath kaun deta hai

kisi ko aazma ke dekhna hamare ba'd

bataenge tumhein wo ahl-e-adab ahl-e-qalam

hamare bare mein tum puchhna hamare ba'd

abhi to rahne do jaisa bhi ghar ka naqsha hai

hamari gaddi pe tum baiThna hamare ba'd

wabaal koi bhi aae to hausla rakhna

hamare naqsh-e-qadam DhunDhna hamare ba'd

abhi to aish karo sar-parast zinda hai

pe KHwahishat ko tum rokna hamare ba'd

abhi to zinda hain aa kar mila karo yaro

jo bhulna hai hamein bhulna hamare ba'd

jo aaj karte hain hum ko 'shafaq' nazar-andaz

karenge yaad hamein dekhna hamare ba'd