ye gham nahin ki KHushi mein bhi kuchh maza na raha

ye ġham nahīñ ki ḳhushī meñ bhī kuchh mazā na rahā

hameñ ye ġham hai ki ab ġham bhī jāñ-fazā na rahā

vo ḳhvāb thā ki ji.eñ dil kī aarzū ke liye

ye vāqi.a hai ki marne kā hausla na rahā

na koī yaar na koī dayār kyā kiije

sivā.e saañs ke ab koī silsila na rahā

zabān kāñToñ kī pyāsī rahe rahe na rahe

hamāre paañv meñ jab koī aabla na rahā

bas ek arz o samā rah ga.e haiñ le de ke

sivā.e un ke koī apnā āshnā na rahā

hazār naqsh banā aur hazār naqsh miTā

kisī varaq pe haqīqat kā mājrā na rahā

ye gham nahin ki KHushi mein bhi kuchh maza na raha

hamein ye gham hai ki ab gham bhi jaan-faza na raha

wo KHwab tha ki jien dil ki aarzu ke liye

ye waqia hai ki marne ka hausla na raha

na koi yar na koi dayar kya kije

siwae sans ke ab koi silsila na raha

zaban kanTon ki pyasi rahe rahe na rahe

hamare panw mein jab koi aabla na raha

bas ek arz o sama rah gae hain le de ke

siwae un ke koi apna aashna na raha

hazar naqsh bana aur hazar naqsh miTa

kisi waraq pe haqiqat ka majra na raha