ye gham rahe na rahe gham-nigari rah jae

ye ġham rahe na rahe ġham-nigārī rah jaa.e

hamāre baa'd bhī hālat hamārī rah jaa.e

ye phuul jhaḌne se bach jaa.eñ munjamid ho kar

shajar pe yūñhī agar barf-bārī rah jaa.e

ḳhavās aur bhī ma.alūm ho sakeñ shāyad

hamārī ḳhaak pe tahqīq jaarī rah jaa.e

mirī zamīn ke mausam badalte jaate haiñ

magar ḳhudā kare ḳhushbū tumhārī rah jaa.e

vo din na aa.e ki chhāle hī gintā rah jā.ūñ

vo shab na aa.e ki anjum-shumārī rah jaa.e

qadam na hoñ bhī to mahv-e-qiyām rah jā.ūñ

jabīñ na ho bhī to sajda-guzārī rah jaa.e

shuā.eñ shām-o-sahar phūTtī raheñ 'shāhid'

hamāre dil kī yūñhī tāb-kārī rah jaa.e

ye gham rahe na rahe gham-nigari rah jae

hamare ba'd bhi haalat hamari rah jae

ye phul jhaDne se bach jaen munjamid ho kar

shajar pe yunhi agar barf-bari rah jae

KHawas aur bhi malum ho saken shayad

hamari KHak pe tahqiq jari rah jae

meri zamin ke mausam badalte jate hain

magar KHuda kare KHushbu tumhaari rah jae

wo din na aae ki chhaale hi ginta rah jaun

wo shab na aae ki anjum-shumari rah jae

qadam na hon bhi to mahw-e-qiyam rah jaun

jabin na ho bhi to sajda-guzari rah jae

shuaen sham-o-sahar phuTti rahen 'shahid'

hamare dil ki yunhi tab-kari rah jae