ye gawara ki mera dast-e-tamanna bandhe

ye gavārā ki mirā dast-e-tamannā bāñdhe

apnī mahram ko na kas kar koī itnā bāñdhe

baḌh ke aa.e nigah-e-shauq balā.eñ le le

koī baiThā hai kis andāz se juuḌā bāñdhe

shohrat-e-be-asarī koī miTā.e kyuuñ kar

ho na dard aah meñ to koī havā kyā bāñdhe

dhajjiyāñ kyā mire dāman kī mire kaam aa.eñ

baiTh kar dasht meñ sab ābla-e-pā bāñdhe

hai burī baat kaho khol ke botal rakh de

shaiḳh pagḌī meñ na bāzār kā saudā bāñdhe

ik zarā khā le havā najd kī ThanDī ThanDī

kah do lailā abhī mahmil meñ na pardā bāñdhe

bikhrī zulfeñ yūñhī lahrā.eñ ruḳh-e-raushan par

kabhī juuḌā na mirā gesuoñ vaalā bāñdhe

jab maiñ dekhūñ mirī āñkhoñ meñ mirā ghar phir jaa.e

chakkar itnā to bayābāñ meñ bagūlā bāñdhe

ham ne dekhā taraf-e-mai-kada jaate the 'riyāz'

ik asā thāme abā pahne amāma bāñdhe

ye gawara ki mera dast-e-tamanna bandhe

apni mahram ko na kas kar koi itna bandhe

baDh ke aae nigah-e-shauq balaen le le

koi baiTha hai kis andaz se juDa bandhe

shohrat-e-be-asari koi miTae kyun kar

ho na dard aah mein to koi hawa kya bandhe

dhajjiyan kya mere daman ki mere kaam aaen

baiTh kar dasht mein sab aabla-e-pa bandhe

hai buri baat kaho khol ke botal rakh de

shaiKH pagDi mein na bazar ka sauda bandhe

ek zara kha le hawa najd ki ThanDi ThanDi

kah do laila abhi mahmil mein na parda bandhe

bikhri zulfen yunhi lahraen ruKH-e-raushan par

kabhi juDa na mera gesuon wala bandhe

jab main dekhun meri aankhon mein mera ghar phir jae

chakkar itna to bayaban mein bagula bandhe

hum ne dekha taraf-e-mai-kada jate the 'riyaz'

ek asa thame aba pahne amama bandhe