ye ghani chhanw ye ThanDak ye dil-o-jaan ka sukun

ye ghanī chhāñv ye ThanDak ye dil-o-jāñ kā sukūñ

merī āñkhoñ pe tire gesu-e-pur-ḳham to nahīñ

lazzat-e-dard vahī hai vahī kaifiyyat-e-zīst

iltifāt-e-nigah-e-nāz abhī kam to nahīñ

dil ke armān machalte hī chale jaate haiñ

ye siyah-rāt tirī kākul-e-barham to nahīñ

uljhaneñ shauq kī baḌhtī hī chalī jaatī haiñ

aaj zulfoñ meñ tirī koī nayā ḳham to nahīñ

ḳhud ko bhūle hue duniyā se gurezāñ rahnā

ye kahīñ terī mohabbat hī kā aalam to nahīñ

DabDabā aa.eñ mujhe dekh ke āñkheñ us kī

haa.e be-dard mire dard-e-moharram to nahīñ

rah ga.iiñ jam ke ye kis par mirī nazreñ 'muztar'

rū-ba-rū aaj vahī husn-e-mujassam to nahīñ

ye ghani chhanw ye ThanDak ye dil-o-jaan ka sukun

meri aankhon pe tere gesu-e-pur-KHam to nahin

lazzat-e-dard wahi hai wahi kaifiyyat-e-zist

iltifat-e-nigah-e-naz abhi kam to nahin

dil ke arman machalte hi chale jate hain

ye siyah-raat teri kakul-e-barham to nahin

uljhanen shauq ki baDhti hi chali jati hain

aaj zulfon mein teri koi naya KHam to nahin

KHud ko bhule hue duniya se gurezan rahna

ye kahin teri mohabbat hi ka aalam to nahin

DabDaba aaen mujhe dekh ke aankhen us ki

hae be-dard mere dard-e-moharram to nahin

rah gain jam ke ye kis par meri nazren 'muztar'

ru-ba-ru aaj wahi husn-e-mujassam to nahin