ye hadson ka naya silsila lage hai mujhe

ye hādsoñ kā nayā silsila lage hai mujhe

ḳhud apne aap meñ kuchh TūTtā lage hai mujhe

zamīn-e-dil pe ye ummīd kā udaas shajar

ġhamoñ kī dhuup meñ jhulsā huā lage hai mujhe

sunā rahī hai jo duniyā ba-tarz-e-barbādī

ye vāqi’a to ḳhud apnā hī sā lage hai mujhe

tire sulūk se is darja Dar gayā huuñ maiñ

ḳhud apne aap se bhī ḳhauf sā lage hai mujhe

tirā karam to mire haal se numāyāñ hai

vo koī aur hai jo bevafā lage hai mujhe

dikhā.ī detā hai apnī havas kā 'aks is meñ

tirā badan bhī ik ā.īna sā lage hai mujhe

na jaane shahr meñ kyā baat ho ga.ī 'unvān'

har ek chehre pe ik ḳhauf sā lage hai mujhe

ye hadson ka naya silsila lage hai mujhe

KHud apne aap mein kuchh TuTta lage hai mujhe

zamin-e-dil pe ye ummid ka udas shajar

ghamon ki dhup mein jhulsa hua lage hai mujhe

suna rahi hai jo duniya ba-tarz-e-barbaadi

ye waqi’a to KHud apna hi sa lage hai mujhe

tere suluk se is darja Dar gaya hun main

KHud apne aap se bhi KHauf sa lage hai mujhe

tera karam to mere haal se numayan hai

wo koi aur hai jo bewafa lage hai mujhe

dikhai deta hai apni hawas ka 'aks is mein

tera badan bhi ek aaina sa lage hai mujhe

na jaane shahr mein kya baat ho gai 'unwan'

har ek chehre pe ek KHauf sa lage hai mujhe