ye haal mah-o-sal hai firaq se visal tak

ye haal māh-o-sāl hai firāq se visāl tak

hayāt ko zavāl hai firāq se visāl tak

ulajh rahe haiñ mustaqil talāsh-e-sādgī meñ ham

ye zindagī to jaal hai firāq se visāl tak

vo kis tarah karūñ bayāñ jo ho ḳhushī kī dāstāñ

malāl hī malāl hai firāq se visāl tak

gumāñ ko kis tarah likhūñ haqīqatoñ kā tarjumāñ

ḳhayāl hī ḳhayāl hai firāq se visāl tak

sukūñ kī niiñd hai kahāñ thamegā kab ye kārvāñ

ubaal hī ubaal hai firāq se visāl tak

yaqīñ meñ kuchh gumān hai gumāñ meñ kuchh yaqīn hai

yahī diloñ kā haal hai firāq se visāl tak

'adīl' dar-ba-dar haiñ ham javāb kī talāsh meñ

savāl hī savāl hai firāq se visāl tak

ye haal mah-o-sal hai firaq se visal tak

hayat ko zawal hai firaq se visal tak

ulajh rahe hain mustaqil talash-e-sadgi mein hum

ye zindagi to jal hai firaq se visal tak

wo kis tarah karun bayan jo ho KHushi ki dastan

malal hi malal hai firaq se visal tak

guman ko kis tarah likhun haqiqaton ka tarjuman

KHayal hi KHayal hai firaq se visal tak

sukun ki nind hai kahan thamega kab ye karwan

ubaal hi ubaal hai firaq se visal tak

yaqin mein kuchh guman hai guman mein kuchh yaqin hai

yahi dilon ka haal hai firaq se visal tak

'adil' dar-ba-dar hain hum jawab ki talash mein

sawal hi sawal hai firaq se visal tak