ye hain jo aastin mein KHanjar kahan se aae

ye haiñ jo āstīn meñ ḳhanjar kahāñ se aa.e

tum siikh kar ye ḳhū-e-sitamgar kahāñ se aa.e

jab thā muhāfizoñ kī nigahbāniyoñ meñ shahr

qātil fasīl-e-shahr ke andar kahāñ se aa.e

kyā phir mujhe ye andhe kueñ meñ girā.eñge

ban kar ye log mere barādar kahāñ se aa.e

ye dasht-e-be-shajar hī jo Thahrā to phir yahāñ

saaya kisī shajar kā mayassar kahāñ se aa.e

uslūb merā siikh liyā tum ne kis tarah

lahje meñ merā Dhab mire tevar kahāñ se aa.e

maazī ke ā.inoñ pe jilā kaun kar gayā

pesh-e-nigāh phir vahī manzar kahāñ se aa.e

daur-e-ḳhizāñ meñ kaise palaT kar bahār aa.ī

pazhmurda shāḳh par ye gul-e-tar kahāñ se aa.e

'mohsin' is iḳhtisār pe qurbān jā.iye

kuuze meñ band ho ke samundar kahāñ se aa.e

ye hain jo aastin mein KHanjar kahan se aae

tum sikh kar ye KHu-e-sitamgar kahan se aae

jab tha muhafizon ki nigahbaniyon mein shahr

qatil fasil-e-shahr ke andar kahan se aae

kya phir mujhe ye andhe kuen mein giraenge

ban kar ye log mere baradar kahan se aae

ye dasht-e-be-shajar hi jo Thahra to phir yahan

saya kisi shajar ka mayassar kahan se aae

uslub mera sikh liya tum ne kis tarah

lahje mein mera Dhab mere tewar kahan se aae

mazi ke aainon pe jila kaun kar gaya

pesh-e-nigah phir wahi manzar kahan se aae

daur-e-KHizan mein kaise palaT kar bahaar aai

pazhmurda shaKH par ye gul-e-tar kahan se aae

'mohsin' is iKHtisar pe qurban jaiye

kuze mein band ho ke samundar kahan se aae