ye hum hain ki jaur-o-sitam dekhte hain

ye ham haiñ ki jaur-o-sitam dekhte haiñ

sahar uTh ke phir ye qadam dekhte haiñ

tirā lutf jab yaar kam dekhte haiñ

to dil par hujūm-e-alam dekhte haiñ

tire ruḳh pe jab zulf ham dekhte haiñ

ham-āġhosh shādī-o-ġham dekhte haiñ

tumhārī nigāh-e-lutf-āmez ko ham

ġhazab hai ki ab besh-o-kam dekhte haiñ

unhīñ kī tarah be-ġharaz ban ga.e haiñ

jo vo dekhte haiñ to ham dekhte haiñ

tasavvur meñ ruḳhsār-o-gesū ke paiham

baham kufr-o-islām ham dekhte haiñ

tumhārā sū-e-mazra.a-e-ġhair aksar

tarashshoh pe abr-e-karam dekhte haiñ

tire nāz-o-andāz se ai sitamgar

sitam hai sitam par sitam dekhte haiñ

Thahar tū zarā josh-e-betābi-e-dil

abhī ham mizāj-e-sanam dekhte haiñ

likheñge mire sīna-chākī kā mazmūñ

vo hañs kar shigāf-e-qalam dekhte haiñ

nahīñ dekhtī gar hameñ tum to dekho

tumheñ to mohabbat se ham dekhte haiñ

ḳhudā par hai ā.īna ai ā.ina-rū

tumheñ ek muddat se ham dekhte haiñ

ḳhudā aabrū jāñ-nisāroñ kī rakh le

ki vo āb-e-teġh-e-do-dam dekhte haiñ

na māñgeñge ab bosa-e-zulf tum se

qasam hai tumhārī qasam dekhte haiñ

samajhte haiñ sīpārah-e-baḳht āshiq

jo taara koī sub.h-dam dekhte haiñ

shab-e-vasl meñ ai 'shagufta' ḳhushī se

karam yaar kā dam-ba-dam dekhte haiñ

ye hum hain ki jaur-o-sitam dekhte hain

sahar uTh ke phir ye qadam dekhte hain

tera lutf jab yar kam dekhte hain

to dil par hujum-e-alam dekhte hain

tere ruKH pe jab zulf hum dekhte hain

ham-aghosh shadi-o-gham dekhte hain

tumhaari nigah-e-lutf-amez ko hum

ghazab hai ki ab besh-o-kam dekhte hain

unhin ki tarah be-gharaz ban gae hain

jo wo dekhte hain to hum dekhte hain

tasawwur mein ruKHsar-o-gesu ke paiham

baham kufr-o-islam hum dekhte hain

tumhaara su-e-mazra-e-ghair aksar

tarashshoh pe abr-e-karam dekhte hain

tere naz-o-andaz se ai sitamgar

sitam hai sitam par sitam dekhte hain

Thahar tu zara josh-e-betabi-e-dil

abhi hum mizaj-e-sanam dekhte hain

likhenge mere sina-chaaki ka mazmun

wo hans kar shigaf-e-qalam dekhte hain

nahin dekhti gar hamein tum to dekho

tumhein to mohabbat se hum dekhte hain

KHuda par hai aaina ai aaina-ru

tumhein ek muddat se hum dekhte hain

KHuda aabru jaan-nisaron ki rakh le

ki wo aab-e-tegh-e-do-dam dekhte hain

na mangenge ab bosa-e-zulf tum se

qasam hai tumhaari qasam dekhte hain

samajhte hain siparah-e-baKHt aashiq

jo tara koi subh-dam dekhte hain

shab-e-wasl mein ai 'shagufta' KHushi se

karam yar ka dam-ba-dam dekhte hain