ye haqiqat hai ki wo shaKHs wafadar na tha

ye haqīqat hai ki vo shaḳhs vafādār na thā

haañ magar maiñ bhī vafā karne ko tayyār na thā

arsa-e-hijr baḌā thā pe ye dushvār na thā

dil to ḳhud hī mirā āmāda-e-dīdār na thā

shahr-e-behis meñ asīrān-e-havas sab the magar

ai mohabbat tirā koī bhī giraftār na thā

merā girya mire aañsū mirī vahshat ke sivā

hijr kī raat koī merā madad-gār na thā

jaane kyūñ-kar use lamhoñ meñ kiyā maiñ ne ubuur

rāsta yuuñ to mohabbat tirā hamvār na thā

maiñ ne kal raat bahut haq kī taraf-dārī kī

sub.h dekhā to koī merā taraf-dār na thā

ye ġhazal saarī hai 'tanvīr' mire ḳhvāb kī den

jab kahī hai ye ġhazal maiñ ne maiñ bedār na thā

ye haqiqat hai ki wo shaKHs wafadar na tha

han magar main bhi wafa karne ko tayyar na tha

arsa-e-hijr baDa tha pe ye dushwar na tha

dil to KHud hi mera aamada-e-didar na tha

shahr-e-behis mein asiran-e-hawas sab the magar

ai mohabbat tera koi bhi giraftar na tha

mera girya mere aansu meri wahshat ke siwa

hijr ki raat koi mera madad-gar na tha

jaane kyun-kar use lamhon mein kiya main ne ubur

rasta yun to mohabbat tera hamwar na tha

main ne kal raat bahut haq ki taraf-dari ki

subh dekha to koi mera taraf-dar na tha

ye ghazal sari hai 'tanwir' mere KHwab ki den

jab kahi hai ye ghazal main ne main bedar na tha