ye haqiqat hai wo kamzor hua karti hain

ye haqīqat hai vo kamzor huā kartī haiñ

apnī taqdīr kā qaumeñ jo gila kartī haiñ

ret par jab bhī banātā hai gharauñdā koī

sar-phirī maujeñ use dekh liyā kartī haiñ

maiñ gulistāñ kī hifāzat kī duā kartā huuñ

bijliyāñ mere nasheman pe girā kartī haiñ

jaane kyā vasf nazar aatā hai mujh meñ un ko

titliyāñ mere ta.āqub meñ rahā kartī haiñ

terī dahlīz se nisbat jise ho jaatī hai

azmateñ us ke muqaddar meñ huā kartī haiñ

kyuuñ na gul-būToñ ke chehroñ pe nikhār aa jaa.e

ye havā.eñ jo tirā zikr kiyā kartī haiñ

apnī nazroñ meñ jo rakhtā hai tire naqsh-e-qadam

manzileñ us ke ta.āqub meñ rahā kartī haiñ

chain kī niiñd mujhe aa.e to kaise aa.e

merī āñkheñ jo tirā ḳhvāb bunā kartī haiñ

us kī rahmat ke diye jo bhī haiñ raushan 'afzal'

āñdhiyāñ un kī hifāzat meñ rahā kartī haiñ

ye haqiqat hai wo kamzor hua karti hain

apni taqdir ka qaumen jo gila karti hain

ret par jab bhi banata hai gharaunda koi

sar-phiri maujen use dekh liya karti hain

main gulistan ki hifazat ki dua karta hun

bijliyan mere nasheman pe gira karti hain

jaane kya wasf nazar aata hai mujh mein un ko

titliyan mere taaqub mein raha karti hain

teri dahliz se nisbat jise ho jati hai

azmaten us ke muqaddar mein hua karti hain

kyun na gul-buTon ke chehron pe nikhaar aa jae

ye hawaen jo tera zikr kiya karti hain

apni nazron mein jo rakhta hai tere naqsh-e-qadam

manzilen us ke taaqub mein raha karti hain

chain ki nind mujhe aae to kaise aae

meri aankhen jo tera KHwab buna karti hain

us ki rahmat ke diye jo bhi hain raushan 'afzal'

aandhiyan un ki hifazat mein raha karti hain